அமீரக தமிழ் வலைப்பதிவுகள்

எல்லாரும் எல்லா வலைப்பதிவுகளையும் வாசிப்பதில்லை. அவரவருக்கு ஒவ்வொரு ரசனைகள். ஒவ்வொரு விருப்பங்கள்.

அதுபோலவே எனக்கும். திரட்டிகளில் சுண்டி இழுக்கும் தலைப்புகளையோ, அதிகமாக பார்வையிட்ட இடுகைகளையோ, தெரிந்தவர்களின் இடுகைகளையோ மட்டுமே நானும் வாசித்து வருகிறேன். போதுமான நேரமின்மையும் இது போன்ற தெரிவிற்கு காரணம். இதுபோல், விருப்பமான பதிவுகளை இழக்க நேரிட மனமில்லாதவர்கள் பல ஃபீட் ரீடர்களை பயன்படுத்தி வருகிறார்கள். அதுபோல நானும் Page Flakes என்னும் ரீடரை பயன்படுத்தி வருகிறேன். இது ரீடராக மட்டுமில்லாமல் பன்முகங்களிலும் பயன்படுகிறது. நமக்கு தேவையான ஃபீட்-களுடன் அதில் பலரால் உருவாக்கப்பட்ட பலவிதமான Flakes-களையும் நாம் நமது பக்கங்களில் சேர்த்து கொள்ளலாம்.

அமீரகத்திலுள்ள பெரும்பான்மையான வலைப்பதிவர்களும் இப்போது தெரிந்தவர்களாகிவிட்டதால், அமீரக வலைப்பதிவுகள் அனைத்தையும் ஒரு பக்கத்தில் வரச்செய்து உங்களுடன் பகிர்ந்தும் கொண்டுள்ளேன். இதில் யாரேனும் அமீரக வலைப்பதிவரின் பதிவு இணைக்கப்படாமல் விடுபட்டிருந்தால் பின்னூட்டத்தில் தெரிவிக்கவும். மாற்றங்கள் தேவையென்றாலும் அமீரக நண்பர்கள் தெரிவிக்கவும்.

நேரமின்மை காரணமாக இதுபற்றி சுருக்கமாகவே எழுத முடிந்தது. Page Flakes-ல் உங்களது பக்கத்தை உருவாக்கி பயன்படுத்துவதில் உதவி தேவையெனில் தெரிவிக்கவும். எனக்கு தெரிந்ததை சொல்லித்தருகிறேன்.

Desert Safari - நாங்களும் படம் காட்டுவோம்ல

கடந்த டிசம்பர் 31-ந்தேதி கடும் குளிர் நேரத்தில் நான் குடும்பத்துடன் டெஸர்ட் ஸஃபாரி சென்றது ஜெஸிலாவின் நேற்றைய பதிவை பார்த்தவுடன் ஞாபகம் வந்தது. எனது 9 ஆண்டு துபை வாழ்க்கையில் அதுதான் நான் சென்றிருந்த முதல் பாலைவனப் பயணம். மீண்டும் மீண்டும் செல்லத்தூண்டும்படி அமைந்தது. அதற்குப் பின் இதுவரை வாய்ப்பு அமையவில்லை. வாய்ப்புகளை உருவாக்கவேண்டும் இனி. அப்படியொரு புது விதமான அனுபவம் அது. அதை உங்களுடன் சொற்களால் பகிர்ந்துகொள்வதை விட எனது கேமராவில் பதிந்து வைத்ததை பகிர்ந்து கொள்ளவே இந்த பதிவு. ஜெஸிலாவின் நேற்றைய பதிவிலேயே அதைப் பற்றி நிறைய தகவல்கள் அறிய கிடைப்பதால் நான் படம் காட்டுவதோடு நிறுத்திக்கொள்கிறேன். (படம் காட்டுறதுலதான் நாம கில்லாடியாச்சே). புகைப்படம் எடுப்பதிலும் கொஞ்சம் ஆர்வம் அதிகம். அதுவும் ஒரு காரணம்.

அமீரகத்தில் இல்லாதவர்களுக்கு கொஞ்சம் எளிதில் புரிந்து கொள்வதற்காக 'கூகிள் புவி'யின் படத்துடன் தொடங்குவோம் பயணத்தை.

இதோ, கீழே இருக்கும் படத்தில் இடது புறம் கடலோரம் இருப்பது தான் துபை. (அப்பாடா ஒரு வழியா பைசா செலவில்லாம துபையை பார்த்த திருப்து கிடைச்சிருக்குமே?). Palm Island & The World எல்லாம் தெரியுதா? வலது புறம் வட்டமிட்டு காட்டப்பட்டிருக்கும் இடம்தான் நாங்கள் சென்ற பாலைவனம். இது துபை-ஹத்தா சாலையில் அமைந்துள்ளது. துபையில் இங்கு செல்ல அதிகபட்சம் அரை மணி நேரம் பிடிக்கும்.




மேலே வட்டமிட்டு காட்டப்பட்டுள்ள பாலைவனத்தின் க்ளோஸ்-அப் மீண்டும் கூகிள் உதவியுடன் கீழே. எப்படி இருக்கிறது பாருங்கள். மண் கடல்.
இதற்குள்தான் பயணம். ஒரு த்ரில்லிங் அனுபவம் தான். அதிலும் எங்களுக்கு கிடைத்த ஓட்டுனர் போல திறமை வாய்ந்தவர் அமைந்துவிட்டால் கேட்கவே வேண்டாம்.




வீட்டு வாசலுக்கே வந்து கூட்டிச்சென்றார்கள். வீட்டிலிருந்து கிளம்பும் போதே அந்த ஓட்டுனர் வயிற்றில் புளியை கரைத்தார். இருந்தாலும், 'இது பனங்காட்டு நரி, இந்த சலசலப்பிற்கெல்லாம் அஞ்சாது' என்பதை போல முகத்தை வைத்துக்கொண்டேன். அரை மணி நேரப் பயணத்திற்குப் பின் கீழுள்ள இடத்தை அடைந்தோம். அங்கு சிறிது இளைப்பாறிக்கொள்ள சொன்னார்கள். அப்புறம் தான் தெரிந்தது நாங்கள் மட்டுமல்ல (நாங்கள் சென்ற வண்டி மட்டுமல்ல) அதே சுற்றுலா நிறுவனத்தை சார்ந்த மேலும் 4 வண்டிகள் நின்றுகொண்டிருந்தன. எல்லா வண்டிகளுக்கும் டயரிலிருந்து காற்றளவை குறைத்தார்கள். அப்போதுதான் பாலவனத்தில் வண்டி எளிதாக செல்லுமாம். பின்னர் அங்கிருந்து ஸஃபாரி தொடங்கியது. அப்போதே எனக்கு என் கையிலிருந்த எனது ஒன்றரை வயது குழந்தையை பற்றி கவலை வந்துவிட்டது. பயந்துவிடுவாளோ என்று. ஆனால் உண்மையில் பயந்தது அவளை தவிர மற்ற யாவரும் தான். She enjoyed a lot. அதிலும் வந்ததிலேயே எங்கள் வண்டி ஓட்டுனர் தான் கேப்டன். அவரை பின்பற்றித்தான் மற்ற 4 வண்டிகளும் வந்து கொண்டிருந்தன.




பயணத்தின் போது பாலைவனத்தின் அழகை ரசித்ததுடன், அதை படமாக்கவும் நான் தவறவில்லை. ஒரு கையில் குழந்தை மறு கையில் கேமரா. அதில் எடுத்த சில படங்களை கீழே காணலாம். கூட வந்த நண்பரின் மனைவி நண்பரை முறைத்து கொண்டே வந்தார். பின்புதான் தெரிந்தது அவர் கொண்டு வந்த கேமராவில் சார்ஜ் இல்லையென்று.


பாலைவனத்தில் நடுவில் எங்களுடன் தொலையும் மற்ற வண்டிகள்.

பாலைவன முகட்டில் அணிவகுக்கும் ஊர்திகளின் கண்கொள்ளா காட்சி.
முகத்தில் மண் வாரி அடிக்கும் (நல்ல வேளை கண்ணாடின்னு ஒன்னை கண்டுபிடிச்சாய்ங்க) Dune Bashing காட்சி இதுதான். என்னதான் கண்ணாடி இருந்தாலும் வண்டிக்கு உள்ளும் தூசி சிறிதாக வரத்தான் செய்தது.

சூரியன் மறையும் தருனத்தில் பாலைவனத்தின் அழகு.
துபை நகரத்தில் பேசி கும்மியடிக்க இடம் இல்லாதது போல் நடு பாலையில் அரபிகளின் மீட்டிங்.

யோவ் படம் காட்டுனது போதும்யா என்று சைகையுடன் எனது மகள்.

குதூகலத்தில் சுற்றி வரும் கார்களும், பைக்குகளும்.

ஒரு வீடியோ காட்சி.

ஒரு இடத்தில் கூட வந்த மற்றொரு வண்டி மண்ணில் புதைந்து மாட்டிக்கொள்ள, இழுத்து உதவி செய்யும் எமது வண்டி.
இவர்தான் அந்த எமகாதக ஓட்டுனர். ஓவ்வொரு இடத்திலும் தன்னால் முடிந்த அளவு எங்களுக்கு வயிற்றில் புளி கரைத்த புண்ணியவான் இவர்தான். ரியல் சூப்பர்மேன். எங்களது வண்டியின் சாகசங்களை பார்த்து கூட வந்த மற்ற வண்டியின் பயணிகள் பொறாமைப்பட வைத்தவர். ஹீரோ.

இவையெல்லாம் முடிந்து இருட்டியவுடன் முகாமிற்கு கொண்டு சென்றார்கள். அங்கு பெல்லி ஆட்டம் மற்றும் இரவு சாப்பாடு. அன்று விடிந்தால் 2007 பிறக்கிறது என்பதால் ஆட்டம் பாட்டம் கொண்டாட்டமாக இருந்தார்கள். குளிர் அதிகமாக (கொடுமையான குளிர்) இருந்ததால் எப்படா சாப்பிட்டுவிட்டு வீட்டுக்கு போய் தூங்கலாம் என்றிருந்தது. புகை படம் எடுக்கும் நிலமை கூட இல்லை அந்த குளிரில். சாப்பாட்டிற்கு அழைத்தார்கள். சுட்ட கறி வகைகள் சுவையாகத்தான் இருந்தது. சாப்பிட்டுவிட்டு வீடு கிளம்பினோம். வீட்டில் எங்களை இறக்கிவிட்டு கிளம்ப இருந்த ஓட்டுனரிடம் 'நீதான் உண்மையான சூப்பர்மேன்' என்றவுடன் வெட்கம் கலந்த சிரிப்புடன் அதே வேகத்தில் சென்றார் அந்த பலுச்சிஸ்தான்காரர்.

துபை மெட்ரோ - கட்டுமானப்பணி புகைப்படங்கள்

துபையை ஒரு உலகத் தரம் வாய்ந்த நகரமாக்கும் முயற்சி இப்போது படும் மும்முரமாக நடை பெற்று வருகிறது. அதன் ஒரு பகுதியாக துபை மெட்ரோ இரயில் திட்டம் தொடங்கப்பட்டு வேலை வேகமாக நடைபெற்று வருகிறது. மெட்ரோ திட்டத்தில் ஆகாய இரயில் திட்டமும் (elevated), பாதாள இரயில் (underground) திட்டமும் அடங்கும். இது பற்றிய கூடுதல் விவரங்கள் அறிய இங்கே க்ளிக்குங்கள்.

இங்கே காணும் படங்கள் துபை பாதாள இரயில் திட்டத்தின் கட்டுமானப்பணிகளின் போது எடுக்கப்பட்டவையாகும். மனிதனின் முயற்சிகளுக்கு எல்லையில்லாமல் போய்விட்டது.

(நன்றி : மின்னஞ்சல் செய்தவருக்கு)

துபையில் துணிச்சலான கொள்ளை - வீடியோ

துபையில் உள்ள Wafi City என்ற ஷாப்பிங் சென்டரில் உள்ள நகைக்கடையில் நேற்று முன்தினம் இரவு 9.30 மணி அளவில் ஒரு துணிச்சலான கொள்ளை நடந்துள்ளது. 50 மில்லியன் திர்ஹாம்கள் (1 Dhm = 11 Rs)மதிப்புள்ள நகைகள் கொள்ளையடிக்கப்பட்டுள்ளன. ஷாப்பிங் சென்டர் திறந்திருந்த நேரத்தில் பொதுமக்கள் முன்னிலையில் இச்சம்பவம் நடந்துள்ளது. இச்சம்பவம் துபையில் பெரும் பரப்பரப்பாக பேசப்பட்டு வருகிறது. இது நன்றாக திட்டமிடப்பட்டு செய்த கொள்ளையாக காவல்துறை வட்டாரங்கள் தெரிவிக்கின்றன.


இரண்டு Audi A8 கார்களுடன் ஷாப்பிங் சென்டரின் கண்ணாடி வாயிலை இடித்து உடைத்தவாரு காரை ஷாப்பிங் சென்டருக்குள் ஓட்டி வந்துள்ளனர். அவர்கள் கொள்ளையடிக்க திட்டமிட்டிருந்த நகைக்கடையின் கண்ணாடியை (இங்கு பெரும்பாலும் நம் நாட்டிலுள்ளதைப் போல் இரும்புக்கதவுகள் இல்லை. கண்ணாடி கதவுகளே) கார் மூலமே உடைத்து மூன்று பேர் மட்டும் இறங்கி கடையில் புகுந்து இரண்டு நிமிடங்களுக்குள் முடிந்தவற்றை அள்ளிக்கொண்டு காரில் பறந்து சென்றுள்ளனர். இவர்கள் கருப்பு உடையணிந்து முகமூடியுடன் காணப்பட்டுள்ளனர். கையில் துப்பாக்கிகளும் வைத்திருந்ததாக நேரில் பார்த்தவர்கள் தெரிவித்துள்ளனர்.



மூன்று நிமிடங்களுக்குள் காவல் துறையினர் விரைந்து வந்தும் அவர்களை பிடிக்க முடியவில்லை. காரை எடுத்துக் கொண்டு கிளம்பிய கொள்ளையர்கள் துபை- அபுதாபி சாலையில் சென்றிருக்கக் கூடும் என்று தெரிகிறது. பின்னர், இரண்டு கார்கள் இந்த சாலையோரத்தில் எரிந்த நிலையில் கிடந்துள்ளன. கொள்ளையர்கள் வெறெங்கேனும் தப்பிச் சென்றிருக்கக் கூடும் என்று காவல் துறை தெரிவிக்கிறது.



அமீரகத்தில் முதன் முறையாக இது போன்ற சம்பவம் நடந்துள்ளது. ஹாலிவுட் சினிமாக்களில் பார்ப்பது போன்ற கொள்ளைச் சம்பவம் இது. நகரங்கள் பெருத்து வருவதற்கு/வளர்வதற்கு கொடுக்கப்பட்ட விலையோ?

இந்த கொள்ளை நடந்த நிகழ்ச்சியை அங்கு நின்றிருந்த ஒருவர் தனது கைத் தொலைபேசியில் வீடியோ எடுத்துள்ளார். மேலும் சிலர் புகைப்படங்களும் எடுத்துள்ளனர்.

பலூன் திருவிழாவும் எனக்கு கிடைத்த ஆப்பும்

சிறிது நாட்களுக்கு முன் முடிவடைந்த 'துபை ஷாப்பிங் திருவிழா'வில் பலூன் திருவிழாவும் (balloon festival) நடைபெற்றது. ஒரு மாத காலம் 'வெப்பக் காற்று' (hot air) பலூன் துபை வானில் பறக்கவிட்டு வேடிக்கை காட்டினார்கள். துபை வரலாற்றில் முதன்முறையாக என்று சன் டிவி ஸ்டைலில் விளம்பரம் வேறு. பெரும்பாலும் துபை புறநகர் பகுதியிலேயே இது நடந்தது.

இம்முறை இதை சோதனை ஓட்டமாகவே நடத்த இருப்பதாகவும், ஸ்பான்ஸர்கள் / வி.ஐ.பி-க்கள் தவிர பொதுமக்கள் (காசு கொடுத்தாலும் கூட) பறக்க முடியாது எனவும் கூறினர். சரி, நமக்கு உள்ள செல்வாக்கை பயன்படுத்தி எப்படியாவது இதில் பறந்தவிட வேண்டும் என மனதில் நினைத்துக் கொண்டேன். அது போலவே வாய்ப்பும் கிட்டியது. அன்றைய தினம் ஜுமைரா Burj-Al-Arab-ல் இருந்து தொடங்கி Global Village வரை பறக்க திட்டமிட்டிருப்பதாக கூறினர். மனைவி குழந்தையுடன் ஜுமைரா Burj-Al-Arab போய் சேர்ந்தேன்.

பலூன் ஒவ்வொன்றாக காற்று நிரப்பி ஆயத்தப்படுத்தினார்கள். அப்போது ஒருங்கினைப்பாளர் ஒருவர் என்னிடம் வந்து யார் யார் பறக்க போகிறீர்கள் என்று கேட்டார். அதற்கு நான் , மனைவி மற்றும் குழந்தை என்றேன். இல்லை சார், குழந்தைகள் பறக்க அனுமதியில்லை என்று ஒரு குண்டை தூக்கி போட்டார். வேறென்ன, வழக்கமான தியாக மனதோடு நான் குழந்தையை பார்த்துக்கொள்வதாகவும் மனைவி மட்டும் பறக்கட்டும் என கூறினேன் (மனதிற்குள் எனதருமை குழந்தையால் எனக்கு கிட்டிய ஆப்பை நினைத்து வருந்தியபடி). நமக்கு ஆப்பு எந்தெந்த ரூபத்திலெல்லாம் வருது பாருங்க. ஆசிப் அண்ணாச்சி ஸ்டைலில் 'நல்லா இரு' என வழியனுப்பி வைத்தேன். என் மனைவி மட்டும் மகிழ்ச்சியாக பறந்தார்.

வந்துட்டு சும்மா போனா நல்லா இருக்காதே என, கையோடு கொண்டு போயிருந்த காமராவில் கொஞ்சம் க்ளிக்கித் தள்ளினேன். இதோ உங்கள் பார்வைக்காக சில..

ஜுமைரா Burj-Al-Arab

பலூன்களில் வெப்பக் காற்று நிரப்பப்படுகிறது

மனைவி பறந்த பலூன் ஆயத்தமாகிறது

மனைவி பறக்கிறார்

அன்று பிடித்தவைகளில் எனக்கு பிடித்தது

துபை - ஒரு குட்டி கேரளாவா?

யாரோ க்ராஃபிக்ஸ் குறும்பனின் கைவண்ணத்தில் எப்படியெல்லாம் துபை ஒரு குட்டி கேரளாவாக மாறியிருக்கிறது பாருங்கள். ஏற்கனவே துபையில் அதிகமான அளவில் மலையாளிகள் வசித்து வருகிறார்கள். ஒரு வேலை மலையாளிகள் இங்கு ஆட்சியை பிடித்தால் (சும்மா ஒரு பேச்சுக்குத்தான்) இக்காட்சிகள் காணக் கிடைக்குமோ!


படம்-1 : துபை Sheik Zayed சாலையில் ஓடும் கேரள அரசுப் பேருந்து.




படம்- 2 : Al Nasr Square - ல் கேரள அரசுப் பேருந்து, ஆட்டோ (ஓட்டோ) மற்றும் மலையாள விளம்பர தட்டிகள்.

படம் -3 : அழகான ஒரு பெட்டிக் கடை.